TSSE Täzelikler

       2026-njy ýylyň 16-njy aprelinde Türkmenistanyň Söwda-senagat edarasynda “Türkmenistan – Hytaý Halk Respublikasy: gaz ulgamynda strategiki hyzmatdaşlygyň 20 ýyllygy” atly ylmy-amaly maslahaty hem-de onuň çäklerinde sergi geçirildi.

        Maslahata Hytaý Halk Respublikasynyň Başlygy Si Szinpiniň tabşyrygy boýunça ýurdumyza sapar bilen gelen Hytaýyň Kommunistik partiýasynyň Merkezi komitetiniň Syýasy býurosynyň hemişelik komitetiniň agzasy, Hytaý Halk Respublikasynyň Döwlet Geňeşiniň Premýeriniň birinji orunbasary Din Sýuesýan gatnaşdy.

         Çäräniň dowamynda Türkmenistan bilen Hytaý Halk Respublikasynyň arasynda goýlan strategiki hyzmatdaşlygyň yzygiderli ösdürilýändigi bellenildi. Taraplar hyzmatdaşlygyň özara hormat goýmak, deňhukuklylyk hem-de uzak möhletleýin hyzmatdaşlyk ýörelgeleri esasynda alnyp barylýandygyny nygtadylar.

         Ylmy-amaly maslahatyň çäklerinde guralan sergi gatnaşyjylara pudaga degişli häzirki zaman çözgütler, tehnologiýalar hem-de hyzmatdaşlygyň mümkinçilikleri bilen tanyşmaga giň mümkinçilik döretdi.

         Maslahat iki ýurduň degişli ugurlary boýunça hyzmatdaşlygyny has-da berkitmek, tejribe alyşmak hem-de geljekki hyzmatdaşlygyň mümkinçiliklerini ara alyp maslahatlaşmak üçin möhüm halkara meýdança hökmünde çykyş etdi.

         Bellenilişi ýaly, bu halkara çäre Türkmenistan bilen Hytaý Halk Respublikasynyň arasyndaky strategiki hyzmatdaşlygyň mundan beýläk-de pugtalanmagyna hem-de döwletara gatnaşyklaryň ýokary derejesiniň berkidilmegine hyzmat edýär.

Türkmenistanyň Söwda-senagat edarasynyň

Metbugat gullugy.