TSSE Täzelikler

     Türkmenistanyň Prezidenti Serdar Berdimuhamedow tarapyndan sanly ulgam arkaly geçirilen Ministrler Kabinetiniň nobatdaky mejlisinde “Halkara senagatçylar we telekeçiler uniwersitetini döretmek hakynda” Permana gol çekdi.     Täze ýokary okuw mekdebi ykdysadyýetiň hususy bölegini ösdürmäge, sanly we innowasion bilimleri ornaşdyrmaga gönükdiriler.

         Bu Halkara uniwersitetiň esasy maksady – häzirki döwrüň talaplaryna laýyk gelýän, täzeçil pikirlenýän, daşary ýurt dillerini bilýän, sanly tehnologiýalardan baş çykarýan hünärmenleri taýýarlamakdyr.

         Halkara senagatçylar we telekeçiler uniwersitetinde okatmagyň usulyýetleri hem häzirki zaman talaplaryna laýyklykda, dünýäniň öňdebaryjy tejribelerine esaslanyp guralar. Okuw meýilnamalaryna ykdysadyýet, dolandyryş, marketing, sanly ykdysadyýet, maglumat tehnologiýalary, maliýe, halkara işewürlik ýaly ugurlary giriziler.

         Täze uniwersitet diňe bir ýokary bilim bermek bilen çäklenmän, işewürlik başlangyçlaryna goldaw berýän ylmy-amaly merkez hökmünde hem çykyş eder. Şeýlelikde, ýaş telekeçiler täze taslamalary ösdürmek, işewür meýilnamalary taýýarlamak we halkara hyzmatdaşlyk guramak boýunça giň mümkinçiliklere eýe bolarlar.

         Bu başlangyç Türkmenistanyň Prezidentiniň ýurdumyzy senagatlaşdyrmak, telekeçiligi höweslendirmek we hususy ulgamyň paýyny artdyrmak baradaky syýasatynyň möhüm bölegidir. Uniwersitetiň döredilmegi bilen telekeçilik ulgamynda bilim kuwwaty has-da artar, ösüşleriň täze eýýamy başlar.

Türkmenistanyň Söwda-senagat edarasynyň

Metbugat gullugy