17.11.2026
Türkmenistanyň
wekiliýetiniň Pakistan Yslam Respublikasynyň paýtagty Yslamabat şäherine amala
aşyran sapary ikitaraplaýyn we köptaraplaýyn ykdysady hyzmatdaşlygy ösdürmäge
gönükdirilen möhüm duşuşyklara beslendi.
2026-njy ýylyň
15 – 16-njy noýabrynda Yslamabat şäherinde Ykdysady Hyzmatdaşlyk Guramasynyň
(YHG) Daşary işler ministrleri Geňeşiniň 30-njy mejlisi geçirildi. Oňa
Türkmenistanyň wekiliýeti hem gatnaşdy. Mejlisiň dowamynda agza döwletleriň
arasynda söwda-ykdysady, ulag we energetika ulgamlarynda hyzmatdaşlygy
giňeltmegiň meseleleri ara alnyp maslahatlaşyldy. Duşuşygyň netijeleri boýunça
Yslamabat Jarnamasy we “Ykdysady hyzmatdaşlygyň strategik maksatlary – 2035”
atly resminama kabul edildi.
Saparyň
çäklerinde Türkmenistanyň Söwda-senagat edarasynyň ýolbaşçysy M.Gurdow bilen
Pakistanyň Söwda-senagat palatalary federasiýasynyň (FPCCI) prezidenti Atif
Ikram Şeýhiň arasynda iş duşuşygy geçirildi. Onda iki ýurduň arasynda
söwda-ykdysady gatnaşyklary pugtalandyrmak, maýa goýum hyzmatdaşlygyny
giňeltmek hem-de işewür wekiliýetleriň özara saparlaryny işjeňleşdirmek
meselelerine garaldy.
Duşuşykda
energetika, gaýtadan dikeldilýän energiýa, dokma senagaty, oba hojalygy we
derman senagaty ýaly ugurlarda hyzmatdaşlygy ösdürmek üçin giň mümkinçilikleriň
bardygy bellenildi. Şeýle-de bilelikdäki maýa goýum forumlaryny geçirmek,
işewür düzümleriň arasynda göni gatnaşyklary ýola goýmak we bazar
maglumatlarynyň alyş-çalşygyny giňeltmek boýunça teklipler öňe sürüldi.
TSSE-nyň
ýolbaşçysy Türkmenistanyň Pakistan bilen söwda-ykdysady gatnaşyklary ähli
derejelerde pugtalandyrmaga taýýardygyny belläp, türkmen telekeçileriniň
pakistanly işewürler, maýadarlar we söwda guramalary bilen hyzmatdaşlygy
ösdürmäge gyzyklanma bildirýändigini nygtady.
Şeýle hem 17-nji
noýabrda Türkmenistan bilen Pakistan Yslam Respublikasynyň arasyndaky ykdysady
hyzmatdaşlyk boýunça bilelikdäki hökümetara toparynyň altynjy mejlisi
geçirildi. Oňa Türkmenistanyň wekiliýeti gatnaşdy. Mejlisiň gün tertibinde iki
ýurduň arasyndaky ykdysady hyzmatdaşlygy ösdürmek bilen bagly meseleler ara
alnyp maslahatlaşyldy.
Yslamabad
şäherinde geçirilen bu duşuşyklar Türkmenistan bilen Pakistanyň arasyndaky
dostlukly gatnaşyklary ykdysady mazmun bilen baýlaşdyrmak, söwda dolanyşygyny
artdyrmak we täze maýa goýum mümkinçiliklerini açmak babatda möhüm ähmiýete eýe
boldy.
Türkmenistanyň
Söwda-senagat edarasynyň
Metbugat gullugy.