TSSE Täzelikler

      Dünýä modasynyň paýtagtlary bolan Parižiň, Milanyň we Londonyň owazy bu gün  Aşgabatda «TurkmenTextile Expo — 2026-da» ýaňlanýar.

    Dünýä belli «Vivienne Westwood»  modalar öýüniň ýolbaşçylarynyň öňünde çykyş eden türkmen dizaýnerleri  dünýä podyumlaryna taýýardygyny subut etdiler. Italiýanyň «Fashion Channel Italy» telekanalynyň esaslandyryjysy Marzio Noçera milli brendlerimiziň häzirki zaman meýilleri bilen bezelen täze lybaslaryna haýran galandygyny aýtdy. Diňe bir moda däl, eýsem ekologik taýdan arassa, tebigy süýümlerden taýýarlanan we smart-enjamlarda dokalan matalar üns merkezinde boldy.

     Abat Muhammetniýazowa, Seýrangeldi Berdiýew, Anna Kor ýaly dizaýnerlerimiz özleriniň täze ýygyndylary bilen sergä gatnaşyjylaryň şowhunly el çarpyşmalaryna mynasyp boldular. Keteniniň, milli keşdeleriň we häzirki zaman stiliniň utgaşmasy hemmeleriň ünsüni çekdi.

   «Miras», "Gülýaka Lybaslary" milli mirasyň iň nepis we kaşaň nusgalaryny podyuma çykardy. «Emine Bridal» gözelligi bilen gözüňi gamaşdyrýan, durmuş toýlary üçin iň näzik lybaslary tanyşdyrdy.

    Bu sergi — Türkmenistanyň diňe bir pagta öndürýän ýurt däl, eýsem dünýä modasyna uly täsir edip biljek gözellik merkezi  bolup biljekdigini subut edýär.

                                                        Türkmenistanyň Söwda-senagat edarasynyň

                                                                                                     Metbugat gullugy.