TSSE Täzelikler

       2026-njy ýylyň 10-njy oktýabrynda Türkmenistanyň Söwda-senagat edarasynda Saglygy goraýyş we derman senagaty işgärleriniň gününe bagyşlanan “Saglygy goraýyş, bilim we sport Berkarar döwletiň täze eýýamynyň Galkynyşy döwründe” atly halkara sergi we ylmy maslahat öz işine başlady.

         Saglygy goraýyş we derman senagaty, Bilim ministrlikleri, Türkmenistanyň Bedenterbiýe we sport baradaky döwlet komiteti hem-de Türkmenistanyň Söwda-senagat edarasy tarapyndan bilelikde guralan çärä Mejlisiň Başlygy, Hökümet agzalary, diplomatik wekilhanalaryň, halkara guramalaryň, ministrlikleriň, pudaklaýyn edaralaryň wekilleri, alymlar we hünärmenler gatnaşdylar.

         Serginiň açylyş dabarasy döredijilik toparlarynyň aýdym-sazly çykyşlary bilen utgaşdy. Gatnaşyjylar Türkmenistanyň Prezidenti Serdar Berdimuhamedowyň bu halkara çärä gatnaşyjylara iberen Gutlagyny uly ruhubelentlik bilen diňlediler.

         Halkara sergide saglygy goraýyş, derman senagaty, bilim we sport ulgamlarynda gazanylan üstünlikler, döwrebap tehnologiýalar hem-de innowasion çözgütler görkezilýär. Ylmy maslahatlarda lukmançylygyň öňdebaryjy usullaryny ornaşdyrmak, sanly tehnologiýalardan peýdalanmak we halkara hyzmatdaşlygyny ösdürmek meselelerine aýratyn üns berilýär.

         10 – 12-nji oktýabr aralygynda dowam etjek halkara çäre tejribe alyşmak, täze hyzmatdaşlyk gatnaşyklaryny ýola goýmak we ylmy-tehnologik ösüşi ilerletmek üçin möhüm meýdança bolup hyzmat edýär.

         Bu halkara sergi Türkmenistanyň saglygy goraýyş, bilim we sport ulgamlaryny ösdürmek, halkara hyzmatdaşlygyny pugtalandyrmak hem-de ilatyň ýaşaýyş-durmuş derejesini ýokarlandyrmak ugrunda alnyp barylýan işleriň aýdyň beýanydyr.

Türkmenistanyň Söwda-senagat edarasynyň

Metbugat gullugy.