TSSE Täzelikler

       2026-njy ýylyň 1-nji oktýabrynda paýtagtymyzdaky “Ýyldyz” myhmanhanasynda Türkmenistanyň Maýa goýum forumy – 2026 (TIF 2026) öz işine başlady. Iki gün dowam edýän iri halkara forumy daşary ýurtlaryň iri kompaniýalarynyň, halkara maliýe guramalarynyň, döwlet edaralarynyň hem-de işewür toparlaryň wekillerini bir ýere jemledi.

         Forumyň açylyş dabarasynda Türkmenistanyň Prezidenti Serdar Berdimuhamedowyň forumyň gatnaşyjylaryna iberen Gutlagy okaldy. Döwlet Baştutanynyň Gutlagynda bellenilişi ýaly, häzirki döwürde innowasiýalara we öňdebaryjy tehnologiýalara daýanýan ykdysady ösüş, maýa goýum hyzmatdaşlygyny giňeltmek hem-de milli ykdysadyýeti diwersifikasiýalaşdyrmak möhüm ugurlaryň biri bolup durýar.

Forum Türkmenistanyň häzirki zaman ykdysady mümkinçiliklerini, maýa goýum üçin amatly şertlerini we halkara hyzmatdaşlygy ösdürmegiň täze ugurlaryny giňden ara alyp maslahatlaşmak üçin möhüm meýdança öwrüldi. Çäräniň dowamynda energetika, nebithimiýa, ulag-logistika, oba hojalygy, sanly ykdysadyýet, Hazar sebiti, syýahatçylyk, şäher infrastrukturasyny ösdürmek hem-de suw serişdelerini dolandyrmak ýaly strategik ugurlar boýunça pikir alyşmalar geçirilýär.

         Forumyň çäklerinde işewür duşuşyklaryň, B2G görnüşindäki gepleşikleriň, maýa goýum hyzmatlaryny hödürleýän guramalaryň we eksport-karz agentlikleriniň wekilleri bilen duşuşyklaryň geçirilmegi göz öňünde tutulýar. Şeýle hem iri taslamalar boýunça maslahatlaşmalar we täze hyzmatdaşlyk mümkinçilikleriniň ara alnyp maslahatlaşmagy halkara işewür gatnaşyklaryny ösdürmäge giň ýol açýar.

         Çäräniň açylyş dabarasynda bellenilişi ýaly, Türkmenistanyň amatly geosyýasy we geo-ykdysady ýerleşişi, baý tebigy serişdeleri hem-de täze ykdysady mümkinçilikleri ýurduň maýa goýum babatda özüne çekijiligini has-da ýokarlandyrýar. Forumyň esasy maksatlarynyň biri hem daşary ýurtly maýadarlar, halkara maliýe-bank düzümleri, döwlet edaralary we türkmen hususy pudagynyň wekilleriniň arasynda netijeli dialogy ösdürmekden ybaratdyr.

         TIF 2026 Türkmenistanyň halkara işewürlik gatnaşyklaryny täze derejä çykarmaga, maýa goýum hyzmatdaşlygynyň gerimini giňeltmäge we geljegi uly taslamalaryň durmuşa geçirilmegine ýardam edýän möhüm halkara meýdança hökmünde öz işini dowam etdirýär.

Türkmenistanyň Söwda-senagat edarasynyň

Metbugat gullugy.