TSSE Täzelikler

      2026-njy ýylyň 29 – 30-njy oktýabrynda Türkiýe Respublikasynyň paýtagty Ankara şäherinde Türki Döwletleriniň Guramasynyň (TDG) döwlet Baştutanlarynyň 13-nji sammiti geçirildi. Hormatly Prezidentimiz Serdar Berdimuhamedowyň ýolbaşçylygyndaky Türkmenistanyň wekiliýetiniň düzüminde Türkmenistanyň Söwda-senagat edarasynyň ýolbaşçysy hem bu ýokary derejeli halkara çäresine gatnaşdy.

 “Türki dünýäsiniň asyry: dilde, pikirde we işde birlik” atly şygar astynda geçirilen Sammitiň dowamynda türki döwletleriň arasynda syýasy, söwda-ykdysady, medeni-ynsanperwer ugurlardaky hyzmatdaşlygy mundan beýläk-de ösdürmek, özara gatnaşyklary berkitmek, şeýle-de sebit we halkara gün tertibiniň möhüm meseleleri ara alnyp maslahatlaşyldy.

Duşuşygyň çäklerinde ykdysady gatnaşyklary giňeltmek, işewür toparlaryň arasyndaky hyzmatdaşlygy işjeňleşdirmek, ulag-logistika, energetika we beýleki ileri tutulýan ugurlarda özara bähbitli hyzmatdaşlygy ösdürmek meselelerine aýratyn üns berildi. Sammitiň jemleri boýunça hyzmatdaşlygy çuňlaşdyrmaga we guramanyň işiniň netijeliligini ýokarlandyrmaga gönükdirilen birnäçe möhüm resminamalara gol çekildi, şol sanda Ankara Jarnamasy kabul edildi.

Mälim bolşy ýaly, Türkmenistanyň Türki Döwletleriniň Guramasy bilen hyzmatdaşlygy oňyn Bitaraplyk ýörelgelerine we parahatçylyk söýüjilikli daşary syýasatyna laýyklykda ösdürilýär. Ýurdumyz synçy döwlet hökmünde guramanyň çäklerinde alnyp barylýan işlere işjeň gatnaşmak bilen, türki döwletleriň arasyndaky dostlukly gatnaşyklary pugtalandyrmaga we köpugurly hyzmatdaşlygy giňeltmäge mynasyp goşant goşýar.

Gahryman Arkadagymyzyň türki dünýäsiniň agzybirligini berkitmek, medeni-ynsanperwer gatnaşyklary ösdürmek we halklaryň taryhy umumylygyny dabaralandyrmak boýunça öňe sürýän başlangyçlary hem bu hyzmatdaşlygyň many-mazmunyny has-da baýlaşdyrýar.

Ankara sammiti türki döwletleriň arasynda özara ynanyşmagy pugtalandyrmak, söwda-ykdysady gatnaşyklary täze derejä çykarmak hem-de geljegi uly hyzmatdaşlyk taslamalaryny durmuşa geçirmek üçin möhüm ähmiýete eýe boldy.

Türkmenistanyň Söwda-senagat edarasynyň

Metbugat gullugy.