TSSE Täzelikler

       2025-nji ýylyň 19-njy sentýabrynda “Awaza” milli syýahatçylyk zolagynda geçirilen Türkmenistanyň maýa goýum forumynyň jemleýji güni ýurduň ykdysadyýetini döwrebaplaşdyrmak, innowasion tehnologiýalary ornaşdyrmak we halkara söwda gatnaşyklaryny pugtalandyrmak meselelerine bagyşlanan giň gerimli maslahatlar bilen başlady.

         Forumyň dowamynda ýurdumyzyň döwlet we hususy pudaklarynyň wekilleri, halkara maliýe guramalarynyň hem-de daşary ýurtly maýa goýujylaryň gatnaşmagynda açyk pikir alyşmalar geçirildi. Çykyş edenler dünýä ykdysadyýetindäki häzirki tendensiýalara laýyklykda, Türkmenistanda sanly ulgamy ösdürmegiň, ýokary tehnologiýalary önümçilige ornaşdyrmagyň we eksport mümkinçiliklerini giňeltmegiň möhümdigini nygtadylar.

         Forumyň jemleýji günündäki duşuşyklar daşary ýurtly işewürleriň türkmen bazaryndaky mümkinçiliklere bolan gyzyklanmasynyň artandygyny görkezdi. Şeýle hem bu çäre Türkmenistanyň halkara söwda we maýa goýum gatnaşyklaryndaky ornuny pugtalandyrmak, ykdysadyýetiň diwersifikasiýasy we innowasion ösüşi üçin möhüm ädim boldy.

         Türkmenistanyň maýa goýum forumy döwletimiziň ykdysady syýasatynyň halkara hyzmatdaşlygyna we tehnologiýa esasly ösüşine gönükdirilendigini tassyklady.

Türkmenistanyň Söwda-senagat edarasynyň

Metbugat gullugy.